नागलीचे धिरडे

नागली हे एक तृणधान्य असून आरोग्याच्या दृष्टीने नागलीला खूप महत्व आहे. नागलीमध्ये क, ई आणि ब जीवनसत्वं असतात. शिवाय नागलीमध्ये लोह, कॅल्शियम, ॲण्टिऑक्सिडण्ट, प्रथिनं, फायबर हे आरोग्यास उपयुक्त घटक असतात. नागलीमध्ये शरीरास आवश्यक कॅलरीज आणि गुड फॅटस असतात. नागलीचा आहारात समावेश केल्यास शांत झोप लागते. पचनव्यवस्था सुधारते. पोटाचं आणि आतड्यांचं आरोग्य चांगलं राहातं. नागलीमुळे वजन कमी होण्यास फायदा होतो. यासाठी नागलीचं धिरडं फायदेशीर ठरतं. नागलीच्या भाकरीपेक्षा नागलीच्या धिरड्यात कमी उष्मांक असतात. नागलीचं धिरडं हे ग्लुटेन फ्री असतं. वजन कमी करण्यासाठी आहार तज्ज्ञ नागलीचं धिरडं खाण्याचा सल्ला देतात.

साहित्य :

1 कप नागलीचं पीठ,
अर्धा चमचा लाल तिखट,
अर्धा चमचा आमचूर पावडर,
थोडी चिरलेली कोथिंबीर,
1 टोमॅटो,
2 मोठे चमचे तेल,
अर्धा कप दही,
अर्धा चमचा धने पावडर,
चिमूटभर हिंग,
पाव चमचा काळे मिरीपूड,
1 कांदा,
1 लहान सिमला मिरची,
2 मोठे चमचे बेसन पीठ,
चवीपुरतं मीठ.

कृती :

नागलीचे धिरडे तयार करण्यासाठी एका बाऊलमध्ये नागलीचं पीठ घ्यावं. नागलीच्या पिठात बेसन आणि दही घालून ते चांगलं एकजीव करावं. नंतर यात टोमॅटो, सिमला मिरची आणि कोथिंबीर हे साहित्य बारीक चिरुन टाकावं. ही सामग्री पिठात कालवल्यावर यात मीठ, लाल तिखट आणि मिरेपूड घालावी. यानंतर आमचूर पावडर, धने पावडर आणि हिंग घालावा. ही सर्व सामग्री घातल्यानंतर यात आवश्यक तेवढं पाणी घालून मध्यम स्वरुपाचं सरसरीत मिश्रण करावं. मिश्रण करुन झाल्यावर ते 5-10 मिनिटं सेट होवू द्यावं. नंतर तवा गरम करावा, ब्रशनं तव्यावर तेल लावून घ्यावं. नंतर एक चमचा मिश्रणाचं घालून त्याचे धिरडे तयार करावे. सकाळच्या वेळेस खाणार असाल तर दही, टोमॅटो केचप यासोबत तो छान लागतो तर रात्रीच्या जेवणात खायचा असल्यास तो नुसताच खाल्ला तरी छान लागतो. किंवा पुदिन्याच्या हिरव्या चटणीसोबत छान लागतो.